તહેવારોની મીઠાશ પર મોંઘવારીનો માર! FDAના નિયમોથી 15% સુધી ભાવ વધારાની શક્યતા

નવરાત્રી, દશેરા અને દિવાળીની મીઠાઈની સીઝન શરૂ થઈ છે ત્યારે મુંબઈના મીઠાઈ વેપારીઓ સામે Food Safety અને FDAના નવા નિયમોનું પાલન કરવાનો પડકાર ઊભો થયો છે. વેપારીઓ સ્વચ્છતા અને હાઇજીન જરૂરી હોવાની વાત સ્વીકારે છે, પરંતુ તેમના મતે હાલના નિયમોનું પાલન ખાસ કરીને નાની દુકાનો માટે ખર્ચાળ સાબિત થઈ શકે છે. તેના કારણે મીઠાઈના ભાવમાં 10થી 15% સુધીનો વધારો થવાની શક્યતા વ્યક્ત કરવામાં આવી રહી છે.

20 જેટલા મુદ્દાઓનું પાલન અને હાઇજીન ઓડિટ

500થી વધુ સભ્યો ધરાવતા મુંબઈ મિષ્ટાન મંડળના સેક્રેટરી અને જૈન સ્વીટ્સના પ્રદીપ જૈનના જણાવ્યા અનુસાર, સંગઠને તેના સભ્યોને પાલન કરવાના આશરે 20 મુદ્દાઓ અંગે જાણકારી આપી છે. આ નિયમોમાં વિવિધ કામગીરીનો રેકોર્ડ જાળવવા ઉપરાંત હાઇજીન ઓડિટ કરાવવાની જોગવાઈ પણ છે. પ્રદીપ જૈનના જણાવ્યા અનુસાર, મુંબઈમાં આશરે 50 જેટલી બ્રાન્ડ ઓર્ગેનાઇઝ્ડ છે અને આવા ખર્ચને પહોંચી વળવાની તેમની ક્ષમતા છે. જોકે, નાની દુકાનો ધરાવતા વેપારીઓ માટે આ નિયમો વધુ મુશ્કેલી ઊભી કરી શકે છે.

સ્ટાફથી લઈને પેકિંગ સુધીના નિયમો

હાલના નિયમોમાં સ્ટાફના મેડિકલ રિપોર્ટ, વ્યક્તિગત હાઇજીન, હાથમાં મોજા અને માથા પર કવર રાખવા જેવી બાબતોનો સમાવેશ થાય છે. આ ઉપરાંત રજિસ્ટર્ડ લાયસન્સ ધરાવતા સપ્લાયર પાસેથી જ માલ ખરીદવો, દુકાન અથવા રેસ્ટોરન્ટની સફાઈનો રેકોર્ડ રાખવો, વાનગીમાં ઉપયોગમાં લેવાતા તેલ અને ઘીની વિગતો જાળવવી તથા દુકાનમાં FSSAI લાયસન્સ દર્શાવવું જરૂરી હોવાનું વેપારીઓ જણાવે છે. પસ્તીનો ઉપયોગ ન કરવો અને માત્ર ફૂડ-ગ્રેડ બોક્સમાં પેકિંગ કરવું પણ નિયમોમાં સામેલ છે.

નાના વેપારીઓ માટે ખર્ચ વધવાનો પડકાર

સાંતાક્રુઝના એક મીઠાઈ વેપારીના જણાવ્યા અનુસાર, કાગળ પર આ નિયમો ગ્રાહકોના સ્વાસ્થ્ય માટે યોગ્ય છે. જોકે, નાના વેપારીઓ માટે તેનું વ્યવહારુ પાલન મુશ્કેલ બની શકે છે. ખાસ કરીને કાચા પેકિંગમાં મીઠાઈ વેચતા વેપારીઓ માટે ઉત્પાદન તારીખ, એક્સપાયરી તારીખ અને મીઠાઈમાં વપરાયેલા તેલ તથા ઘીની વિગતો આપવી મુશ્કેલ હોવાનું તેમનું કહેવું છે. વેપારીઓના મતે, આ સમગ્ર પ્રક્રિયાના કારણે દુકાનદારોના ઉત્પાદન ખર્ચમાં 10થી 15% સુધીનો વધારો થઈ શકે છે. તેની અસર મીઠાઈના અંતિમ ભાવ પર પડવાની શક્યતા છે.

70% વેપારીઓ અનઓર્ગેનાઇઝ્ડ, તહેવારોમાં વેચાણ પર પણ અસર

મુંબઈમાં આશરે 2,500 મીઠાઈના દુકાનદારો હોવાનું વેપારીઓ જણાવે છે. તેમાં લગભગ 70% વેપારીઓ અનઓર્ગેનાઇઝ્ડ છે અને તેમની પાસે મોટો સ્ટાફ પણ નથી. દિવાળીના તહેવારો દરમિયાન મીઠાઈનું વેચાણ સામાન્ય વેચાણની સરખામણીએ 10થી 15% વધતું હોવાનું જણાવાય છે. જોકે, વેપારીઓના મતે ચોકલેટ, ડ્રાયફ્રૂટ અને ફળોના વધતા વપરાશને કારણે છેલ્લા પાંચ વર્ષમાં તહેવારોમાં મીઠાઈનું વેચાણ 50% રહી ગયું છે. આ સ્થિતિમાં નવા નિયમોના પાલનનો વધારાનો ખર્ચ નાના વેપારીઓ માટે વધુ પડકારરૂપ બની શકે છે.

આ પણ વાંચો : નેસ્લેની મુશ્કેલી વધી! મેગીથી Nescafé સુધી FSSAIએ ફટકારી નોટિસ

આ પણ જુઓ:

Watch onYouTube