16 નહીં, હવે 24 કોચની Vande Bharat Sleeper! 1,224 બર્થ સાથે નવી ટ્રેનની તૈયારી

ભારતીય રેલવે લાંબા અંતરની મુસાફરીને વધુ આરામદાયક બનાવવા માટે Vande Bharat Sleeperનું મોટું વર્ઝન તૈયાર કરવાની દિશામાં આગળ વધી રહી છે. અત્યાર સુધી 16 કોચવાળી Vande Bharat Sleeperનું વર્ઝન રજૂ કરવામાં આવ્યું છે, પરંતુ હવે રેલવે 24 કોચવાળી Vande Bharat Sleeper તૈયાર કરવાની યોજના પર કામ કરી રહી છે. વધુ કોચ સાથે ટ્રેનમાં બર્થની સંખ્યા પણ વધશે, જેથી એક જ ટ્રેનમાં વધુ મુસાફરો મુસાફરી કરી શકશે.

24 કોચની ટ્રેનમાં 1,224 બર્થ

રિપોર્ટ અનુસાર, હાલની 16 કોચવાળી Vande Bharat Sleeperમાં આશરે 823 બર્થ છે. જ્યારે 24 કોચના નવા વર્ઝનમાં બર્થની સંખ્યા વધીને 1,224 સુધી પહોંચી શકે છે. આનાથી ખાસ કરીને રાત્રિના લાંબા અંતરના પ્રવાસમાં વધુ મુસાફરોને સ્લીપર બર્થ ઉપલબ્ધ થઈ શકે છે. જોકે, બર્થની અંતિમ સંખ્યા ટ્રેનના ફાઇનલ ડિઝાઇન પર આધારિત રહેશે. ચેન્નાઈ સ્થિત Integral Coach Factory (ICF)ને આવી 50 Vande Bharat Sleeper ટ્રેન બનાવવાની જવાબદારી સોંપવામાં આવી હોવાના અહેવાલ છે.

પેન્ટ્રી કારથી લાંબી મુસાફરીમાં વધુ સુવિધા

24 કોચની નવી Vande Bharat Sleeperની એક મહત્વની વિશેષતા તેમાં અલગ પેન્ટ્રી કારનો સમાવેશ છે. આથી લાંબી મુસાફરી દરમિયાન મુસાફરો માટે ભોજન ઉપલબ્ધ કરાવવાની વ્યવસ્થા વધુ સારી બની શકે છે. આ ઉપરાંત કોચમાં નાની પેન્ટ્રી યુનિટ અને ચાદર-કંબળ રાખવા માટે અલગ જગ્યા બનાવવાની યોજના છે. મુસાફરો માટે આરામદાયક બર્થ, મોબાઇલ અને લેપટોપ ચાર્જિંગ પોઇન્ટ, વાંચવા માટે અલગ લાઇટ, સામાન રાખવાની વધુ સારી વ્યવસ્થા અને આધુનિક ટોયલેટ જેવી સુવિધાઓનો પણ પ્રસ્તાવ છે. દિવ્યાંગ મુસાફરો માટે પણ વિશેષ સુવિધાઓ ઉપલબ્ધ કરાવવાની યોજના છે.

180 કિમી પ્રતિ કલાકની ડિઝાઇન સ્પીડ

નવી Vande Bharat Sleeperમાં મુસાફરોને આધુનિક સુવિધાઓ સાથે આરામદાયક મુસાફરી આપવાનું રેલવેનું લક્ષ્ય છે. તેમાં વધુ સારું સસ્પેન્શન, અવાજ ઘટાડવાની વ્યવસ્થા, આધુનિક સુરક્ષા સિસ્ટમ અને ઊર્જા બચાવતી ટેક્નોલોજી જેવા ફીચર્સ સામેલ કરવાની યોજના છે. ટ્રેનની ડિઝાઇન સ્પીડ 180 કિમી પ્રતિ કલાક હોવાનું જણાવાયું છે, જ્યારે તેની સંભવિત ઓપરેટિંગ સ્પીડ 160 કિમી પ્રતિ કલાક હોઈ શકે છે. જોકે વાસ્તવિક ઝડપ રેલવે રૂટ અને ટ્રેકની ક્ષમતા પર નિર્ભર રહેશે.

2026ના અંત સુધી પ્રોટોટાઇપ તૈયાર કરવાનો લક્ષ્યાંક

રિપોર્ટ મુજબ 24 કોચની Vande Bharat Sleeperનું ડિઝાઇન તૈયાર કરવાનું કામ ચાલી રહ્યું છે. તેના પ્રોટોટાઇપને 2026ના અંત સુધી તૈયાર કરવાનો લક્ષ્યાંક જણાવવામાં આવ્યો હતો. જોકે, આ સમયમર્યાદા ટ્રેનનો પ્રોટોટાઇપ તૈયાર કરવા માટેની છે અને મુસાફરો માટે ટ્રેન ક્યારેથી શરૂ થશે તેની અંતિમ તારીખ નથી. ટ્રેન શરૂ કરતા પહેલાં તેનું નિર્માણ, પરીક્ષણ અને રેલવેની જરૂરી મંજૂરી જેવી પ્રક્રિયાઓ પૂર્ણ કરવાની રહેશે.

આ પણ વાંચો : સરકારી વાહન ખરીદીમાં 'પદ'નું મહત્વ ઘટ્યું, હવે કામગીરી અને ઉપયોગિતા નક્કી કરશે પસંદગી

આ પણ જુઓ:

Watch onYouTube