ટ્રાન્સપોર્ટ અને ફ્લીટ ઓપરેટર્સને મોટી રાહત, EV-CNG કોમર્શિયલ વાહનોની વયમર્યાદા 5 વર્ષ વધારવાનો પ્રસ્તાવ

દેશના ટ્રાન્સપોર્ટ ઓપરેટર્સ, ફ્લીટ ઓનર્સ અને ઓટો-કમ્પોનેન્ટ ઉત્પાદકો માટે રાહતના સમાચાર આવ્યા છે. MoRTH એ સેન્ટ્રલ મોટર વ્હીકલ રૂલ્સમાં મોટા ફેરફારોના પ્રસ્તાવો રજૂ કર્યા છે. આ નવા પ્રસ્તાવનો મુખ્ય હેતુ ઇલેક્ટ્રિક વ્હીકલ (EV), હાઇડ્રોજન અને CNG જેવા વૈકલ્પિક ઇંધણથી ચાલતા કોમર્શિયલ વાહનોને પ્રોત્સાહન આપવાનો છે. આ અંગે મંત્રાલયે તમામ સંબંધિત પક્ષો પાસેથી 30 દિવસની અંદર સૂચનો અને વાંધાઓ માંગ્યા છે.

EV અને CNG કોમર્શિયલ વાહનોની ઉંમર વધશે

માર્ગ પરિવહન અને રાજમાર્ગ મંત્રાલય એટલે કે MoRTHએ સેન્ટ્રલ મોટર વ્હીકલ રૂલ્સમાં મહત્વપૂર્ણ ફેરફારોનો પ્રસ્તાવ રજૂ કર્યો છે. આ પ્રસ્તાવનો મુખ્ય હેતુ ઇલેક્ટ્રિક વ્હીકલ, હાઇડ્રોજન અને CNG જેવા વૈકલ્પિક ઇંધણથી ચાલતા કોમર્શિયલ વાહનોને પ્રોત્સાહન આપવાનો છે. પ્રસ્તાવ મુજબ ઇલેક્ટ્રિક, હાઇડ્રોજન અને નેચરલ ગેસ આધારિત કોમર્શિયલ વાહનોની નિર્ધારિત વયમર્યાદામાં 5 વર્ષ સુધીનો વધારો કરવામાં આવી શકે છે. આ ફેરફારથી ફ્લીટ ઓપરેટર્સ પોતાના વાહનોનો વધુ લાંબા સમય સુધી ઉપયોગ કરી શકશે અને વારંવાર નવા વાહનો ખરીદવાનો ખર્ચ ઘટી શકે છે.

ટેમ્પરરી રજિસ્ટ્રેશનમાં મળશે રાહત

વ્હીકલ બોડી બિલ્ડિંગ માટે બોડી વગરના ચેસિસનું ટેમ્પરરી રજિસ્ટ્રેશન 6 મહિના સુધી આપવાનો પ્રસ્તાવ કરવામાં આવ્યો છે. જરૂરિયાત મુજબ તેમાં 30-30 દિવસનું એક્સટેન્શન પણ મળી શકશે. આ ઉપરાંત Fully Built Vehicleને બીજા રાજ્યમાં રજૂ કરવા અથવા કન્વર્ઝન માટે 45 દિવસનું ટેમ્પરરી રજિસ્ટ્રેશન આપવાની જોગવાઈ પણ પ્રસ્તાવમાં સામેલ છે.

નેશનલ પરમિટ પ્રક્રિયા થશે વધુ સરળ

પ્રસ્તાવ હેઠળ નેશનલ પરમિટ ઓથોરાઇઝેશન ઇલેક્ટ્રોનિક પદ્ધતિથી જારી કરવામાં આવશે. નેશનલ પરમિટની મુદત 1 વર્ષથી લઈને મહત્તમ 5 વર્ષ સુધીની હોઈ શકે છે. તેની વાર્ષિક ફી ₹16,500 રાખવાનો પ્રસ્તાવ છે.

ઓટો-કમ્પોનેન્ટ ઉત્પાદકોને ફાયદો

પ્રસ્તાવમાં ઓટો-કમ્પોનેન્ટ મેન્યુફેક્ચરર્સને Rule 33ના ક્ષેત્રમાં સામેલ કરવામાં આવ્યા છે. તેના કારણે તેઓ R&D એટલે કે સંશોધન અને વિકાસ તેમજ નવી ટેકનોલોજી પર વધુ ધ્યાન આપી શકશે.

વ્હીકલ રજિસ્ટ્રેશન વધુ ડિજિટલ બનશે

વ્હીકલ રજિસ્ટ્રેશન દરમિયાન વાહન માલિકનો આધાર સાથે જોડાયેલો મોબાઇલ નંબર અને લોન અથવા Hypothecationની વિગતો નોંધવાની જોગવાઈ પ્રસ્તાવિત છે. VAHAN પોર્ટલ દ્વારા ઇન્શ્યોરન્સ, PUC, ફિટનેસ અને ચલાણ હિસ્ટ્રી જેવી માહિતી Auto-fetch થઈ જશે. ડીલરોના Trade Certificate માટે GST, PAN અને CIN જેવી વિગતોને પણ પ્રક્રિયા સાથે જોડવામાં આવશે.

કોને થશે સૌથી વધુ ફાયદો?

આ પ્રસ્તાવિત ફેરફારોનો સૌથી વધુ લાભ ટ્રાન્સપોર્ટ ઓપરેટર્સ, ફ્લીટ ઓનર્સ, EV અને CNG કોમર્શિયલ વ્હીકલ કંપનીઓ, ઓટો-કમ્પોનેન્ટ ઉત્પાદકો, વ્હીકલ બોડી બિલ્ડર્સ અને ડીલર્સને થઈ શકે છે. મંત્રાલયે આ પ્રસ્તાવ અંગે તમામ સંબંધિત પક્ષો પાસેથી 30 દિવસની અંદર સૂચનો અને વાંધાઓ માંગ્યા છે.