NPCIનો FY26માં ચોખ્ખો નફો 12% ઘટીને ₹1,362 કરોડ થયો, આવક 21% વધી

ભારતના ડિજિટલ પેમેન્ટ સિસ્ટમની કરોડરજ્જુ ગણાતી NPCIના નાણાકીય પરિણામોમાં નફામાં ઘટાડો જોવા મળ્યો છે. નાણાકીય વર્ષ 2025-26માં NPCIનો નેટ સરપ્લસ 12% ઘટીને ₹1,362 કરોડ રહ્યો છે. ગયા નાણાકીય વર્ષમાં NPCIનો નેટ સરપ્લસ ₹1,552 કરોડ હતો. જોકે, કંપનીની આવકમાં મજબૂત વૃદ્ધિ નોંધાઈ છે. FY26માં NPCIની સ્ટેન્ડઅલોન આવક 21% વધીને ₹3,969 કરોડ થઈ છે.

ખર્ચ વધવાથી નફા પર અસર

NPCIના નફામાં ઘટાડાનું મુખ્ય કારણ વધેલા ખર્ચ છે. કંપનીના માર્કેટિંગ ખર્ચ અને ડિપ્રિસિએશન ખર્ચમાં વધારો થયો છે. આ ઉપરાંત AI આધારિત ઇન્ફ્રાસ્ટ્રક્ચરની માંગ વધતા સર્વર ખર્ચમાં પણ વધારો થયો છે, જેના કારણે ઓપરેટિંગ અને એડમિનિસ્ટ્રેટિવ ખર્ચ વધ્યો છે.

UPI ડિજિટલ પેમેન્ટનો મુખ્ય આધાર

NPCI દેશના મોટા ભાગના ડિજિટલ પેમેન્ટ સેટલમેન્ટનું સંચાલન કરે છે. સંસ્થા UPI ઉપરાંત IMPS, NACH અને આધાર આધારિત AePS જેવી સેવાઓ પણ સંભાળે છે. UPI હાલમાં ભારતના ડિજિટલ ટ્રાન્ઝેક્શનનો સૌથી લોકપ્રિય માધ્યમ છે અને દેશના કુલ ડિજિટલ પેમેન્ટમાં તેનો હિસ્સો લગભગ 89% છે. NPCIના જણાવ્યા મુજબ UPI મારફતે દરરોજ લગભગ 80 કરોડ ટ્રાન્ઝેક્શન થાય છે અને દર મહિને 24 અબજથી વધુ ટ્રાન્ઝેક્શન નોંધાય છે.

MDR પર નજર

સરકાર મોટા વેપારીઓ માટે હાઇ-વેલ્યૂ UPI ટ્રાન્ઝેક્શન પર મર્ચન્ટ ડિસ્કાઉન્ટ રેટ (MDR) લાવવાની શક્યતા પર વિચાર કરી રહી છે. જોકે, આ વ્યવસ્થાથી NPCIને કેટલો વધારાનો ફાયદો મળશે તે હજુ સ્પષ્ટ નથી.

આ પણ વાંચો: સેન્સેક્સ તળિયાથી 600 પોઇન્ટ અને નિફટી 200 પોઇન્ટ સુધરવા છતાં બજાર ઘટીને બંધ આવ્યું

RuPay અને વૈશ્વિક વિસ્તરણ

NPCI દેશના સ્થાનિક કાર્ડ નેટવર્ક RuPayનું પણ સંચાલન કરે છે, જે Visa અને Mastercard સાથે સ્પર્ધા કરે છે. RuPay ક્રેડિટ કાર્ડને UPI સાથે જોડવાથી તેનો ઉપયોગ વધ્યો છે. NPCIની આંતરરાષ્ટ્રીય શાખા NIPL દ્વારા UPIને અન્ય દેશોમાં વિસ્તારવાની કામગીરી પણ ચાલી રહી છે. NPCIની આવકમાં વૃદ્ધિ છતાં વધતા ટેક્નોલોજી અને ઓપરેટિંગ ખર્ચના કારણે FY26માં નફામાં ઘટાડો થયો છે. જોકે, UPI અને ડિજિટલ પેમેન્ટના સતત વિસ્તરણને કારણે NPCIની ભૂમિકા ભારતીય ફિનટેક ઇકોસિસ્ટમમાં મહત્વપૂર્ણ બની રહી છે.

અમારી WhatsApp ચેનલમાં જોડાવા નીચે આપેલી લિંક પર ક્લીક કરો

https://whatsapp.com/channel/0029VbDPNhHISTkJEDTirJ16