ONGC માટે ખુલ્યો વેનેઝુએલાનો રસ્તો, હવે ઓઇલ પ્રોજેક્ટ્સમાં કરશે વિસ્તરણ

સરકારી ઓઇલ કંપની ONGC હવે વેનેઝુએલામાં પોતાની કામગીરી વધારી શકશે. કંપનીને અમેરિકાના Office of Foreign Assets Control (OFAC) પાસેથી મંજૂરી મળી છે, જેના કારણે અગાઉ પ્રતિબંધોના કારણે મર્યાદિત રહેલી કામગીરીને આગળ વધારવાનો માર્ગ ખુલ્યો છે. મંજૂરી બાદ ONGC હવે વેનેઝુએલા પ્રોજેક્ટ્સમાં વધુ રોકાણ કરી શકશે, ઓઇલ ઉત્પાદન વધારી શકશે અને નવા કરારો પર કામ કરી શકશે.

ઓઇલ પ્રોજેક્ટ્સનું સંચાલન સંભાળવાની તૈયારી

ONGC હવે વેનેઝુએલામાં કેટલાક ઓઇલ પ્રોજેક્ટ્સનું સંચાલન સંભાળવાની શક્યતા જોઈ રહી છે. કંપની વેનેઝુએલાની સરકારી ઓઇલ કંપની PDVSA સાથે નવા કરારો અંગે ચર્ચા કરી રહી છે.

ONGCના ડિરેક્ટર-ફાઇનાન્સ અનુપમ અગ્રવાલે જણાવ્યું કે અગાઉ પ્રતિબંધ સંબંધિત જોખમોના કારણે કંપનીની કામગીરી મર્યાદિત હતી, પરંતુ હવે કંપનીને વધુ સ્વતંત્રતા મળશે.

$500 મિલિયનથી વધુના ડિવિડન્ડની આશા

OFACની મંજૂરીથી ONGCને વેનેઝુએલા પ્રોજેક્ટ્સ સાથે જોડાયેલા નાણાકીય વ્યવહારો કરવામાં સરળતા રહેશે. આ ઉપરાંત કંપનીને લાંબા સમયથી અટવાયેલા $500 મિલિયનથી વધુના ડિવિડન્ડ મેળવવામાં પણ મદદ મળી શકે છે.

વેનેઝુએલા કેમ મહત્વનું?

વેનેઝુએલા પાસે આશરે 303 અબજ બેરલના સાબિત ક્રૂડ ઓઇલ ભંડાર છે, જે વિશ્વમાં સૌથી મોટા ભંડારમાં સામેલ છે. જોકે, અગાઉના પ્રતિબંધો, ઓછું રોકાણ અને ઓપરેશનલ પડકારોના કારણે ત્યાંનું ઓઇલ ઉત્પાદન ક્ષમતા મુજબ થઈ શક્યું નથી.