ગુજરાતના યાત્રીઓને ખુશખબર! સાબરમતી-જમ્મુ તાવી એક્સપ્રેસ હવે સીધી વૈષ્ણોદેવી-કટરા સુધી જશે

વૈષ્ણોદેવીનાં દર્શને જવાનું આયોજન કરતા ગુજરાતના શ્રદ્ધાળુઓ માટે રેલવે તરફથી મોટી સુવિધા શરૂ થવા જઈ રહી છે. પશ્ચિમ રેલવેએ સાબરમતી–જમ્મુ તાવી એક્સપ્રેસને હવે શ્રી માતા વૈષ્ણોદેવી કટરા સુધી લંબાવવાનો નિર્ણય કર્યો છે. આથી યાત્રીઓને હવે જમ્મુ તાવીથી કટરા પહોંચવા માટે અલગ ટ્રેન કે વાહનની વ્યવસ્થા કરવાની જરૂર નહીં રહે.

18 ઑક્ટોબરથી કટરા સુધી દોડશે ટ્રેન

ટ્રેન નંબર 19223 સાબરમતી–શ્રી માતા વૈષ્ણોદેવી કટરા એક્સપ્રેસની લંબાવેલી સેવા 18 ઑક્ટોબર 2026થી શરૂ થતી મુસાફરીથી અમલમાં આવશે. ટ્રેન દરરોજ સવારે 10:25 વાગ્યે સાબરમતીથી ઉપડશે અને બીજા દિવસે સાંજે 6:55 વાગ્યે કટરા પહોંચશે.

20 ઑક્ટોબરથી વળતી સેવા

વળતી દિશામાં ટ્રેન નંબર 19224 કટરા–સાબરમતી એક્સપ્રેસની લંબાવેલી સેવા 20 ઑક્ટોબર 2026થી શરૂ થશે. આ ટ્રેન કટરાથી દરરોજ સવારે 4:50 વાગ્યે રવાના થશે અને બીજા દિવસે બપોરે 2:05 વાગ્યે સાબરમતી પહોંચશે.

નવા રૂટ પર વધારાના સ્ટોપ

લંબાવેલા રૂટ પર બંને દિશાની ટ્રેનોને સાંબા અને શહીદ કેપ્ટન તુષાર મહાજન સ્ટેશન પર વધારાના સ્ટોપ મળશે. સાબરમતીથી કટરા જતી ટ્રેનને બારી બ્રાહ્મણ ખાતે પણ વધારાનો સ્ટોપ આપવામાં આવશે.

વૈષ્ણોદેવી યાત્રા હવે વધુ સરળ

અત્યાર સુધી સાબરમતી–જમ્મુ તાવી એક્સપ્રેસથી જતા યાત્રીઓને જમ્મુથી કટરા સુધી અલગ વ્યવસ્થા કરવી પડતી હતી. હવે ટ્રેન સીધી કટરા સુધી દોડવાથી ગુજરાતના યાત્રીઓ માટે વૈષ્ણોદેવી સુધીની મુસાફરી વધુ સરળ બનશે. બંને દિશામાં આ સેવા દરરોજ ઉપલબ્ધ રહેશે.