લો ફરી એકવાર વધ્યા પેટ્રોલ અને ડીઝલના ભાવ, નાયરા એનર્જીએ ગ્રાહકોને આપ્યો આંચકો

દેશવાસીઓને ફરી એકવાર મોંઘવારીનો ડામ મળ્યો છે. દેશની સૌથી મોટી ખાનગી ઇંધણ રિટેલર Nayara Energyએ પેટ્રોલના ભાવમાં પ્રતિ લિટર ₹5 અને ડીઝલના ભાવમાં ₹3નો વધારો કર્યો છે. સૂત્રોના જણાવ્યા મુજબ, આંતરરાષ્ટ્રીય બજારમાં કાચા તેલ અને રિફાઇન્ડ ઇંધણના ભાવ વધતા કંપનીએ રિટેલ ભાવ અને ખર્ચ વચ્ચેનું અંતર ઘટાડવા માટે આ નિર્ણય લીધો છે. નવા ભાવ શનિવારની વહેલી સવારથી અમલમાં આવ્યા છે.

વૈશ્વિક ઇંધણના ભાવ વધતા દબાણ

આ વધારો એવા સમયે કરવામાં આવ્યો છે જ્યારે વૈશ્વિક ઊર્જાના ભાવ ફરીથી વધ્યા છે. ભૂ-રાજકીય તણાવને કારણે કાચા તેલ અને પેટ્રોલિયમ ઉત્પાદનોના બજારમાં અસ્થિરતા વધી છે અને તેનો દબાણ ઇંધણ વેચતી કંપનીઓ પર પડી રહ્યો છે. Nayara Energy દેશમાં 7,108 પેટ્રોલ પંપ ચલાવે છે. કંપનીના પ્રવક્તાને આ અંગે મોકલાયેલા પ્રશ્નનો જવાબ મળ્યો ન હતો.

માર્ચમાં પણ વધાર્યા હતા ભાવ

આ વર્ષની શરૂઆતમાં ઈરાન સંઘર્ષના કારણે ઊર્જા પુરવઠામાં ખલેલ પડ્યા બાદ આંતરરાષ્ટ્રીય તેલના ભાવ વધ્યા હતા. 26 માર્ચે Nayaraએ પેટ્રોલમાં ₹5 અને ડીઝલમાં ₹3નો વધારો કર્યો હતો. તે સમયે કંપનીના પેટ્રોલ પંપ પર પેટ્રોલનો ભાવ ₹100.71 પ્રતિ લિટર અને ડીઝલનો ભાવ ₹91.31 પ્રતિ લિટર થયો હતો.

જુલાઈમાં વધારો પાછો ખેંચાયો હતો

પશ્ચિમ એશિયામાં તણાવ ઘટતાં આંતરરાષ્ટ્રીય કાચા તેલના ભાવમાં નરમાઈ આવી હતી. ત્યારબાદ 1 જુલાઈએ Nayaraએ પેટ્રોલમાં ₹5 અને ડીઝલમાં ₹3નો ઘટાડો કર્યો હતો. આ ઘટાડા બાદ Nayaraના ભાવ સરકારી તેલ કંપનીઓના ભાવની નજીક આવી ગયા હતા. હવે તાજેતરનો વધારો વધેલા ખર્ચનો બોજ ગ્રાહકો સુધી પહોંચાડવાનો ફરી પ્રયાસ માનવામાં આવી રહ્યો છે.

સરકારી કંપનીઓ પાસે 90%થી વધુ પંપ

Indian Oil Corporation, Bharat Petroleum Corporation અને Hindustan Petroleum Corporation જેવી સરકારી તેલ કંપનીઓ દેશના કુલ 1,04,137 પેટ્રોલ પંપમાંથી 90%થી વધુનું સંચાલન કરે છે. આ કંપનીઓ આંતરરાષ્ટ્રીય કાચા તેલના ભાવમાં મોટો ફેરફાર થતો હોવા છતાં સામાન્ય રીતે રિટેલ ભાવમાં તાત્કાલિક ફેરફાર કરતી નથી.

આ પણ વાંચો: 57% તૂટ્યા બાદ Railway Stock ની વાપસી? કંપનીને ₹3.65 કરોડનો મોટો ઓર્ડર મળ્યો

મે મહિનામાં સરકારી કંપનીઓએ પણ ભાવ વધાર્યા

મે મહિનામાં સરકારી તેલ કંપનીઓએ અલગ અલગ તબક્કામાં પેટ્રોલ અને ડીઝલના ભાવ વધાર્યા હતા. મેના અંત સુધીમાં કુલ વધારો લગભગ ₹7.50 પ્રતિ લિટર સુધી પહોંચ્યો હતો. 25 મેના ચોથા વધારામાં પેટ્રોલમાં ₹2.61 અને ડીઝલમાં ₹2.71 પ્રતિ લિટરનો વધારો કરવામાં આવ્યો હતો.

ખાનગી રિટેલરો પર વધી રહેલું દબાણ

1 ઓક્ટોબરે સરકારે કહ્યું હતું કે ખાનગી રિટેલરો તેમના પંપ પર પેટ્રોલ અને ડીઝલનું વેચાણ મર્યાદિત ન કરે. Nayara અને Jio-bpએ રિટેલ વેચાણમાં નુકસાનને કારણે કેટલાક પંપ પર વેચાણ મર્યાદિત કર્યું હતું. અધિકારીઓના જણાવ્યા મુજબ, રિટેલ અને બલ્ક ડીઝલના ભાવ વચ્ચેના તફાવતને કારણે ઔદ્યોગિક ગ્રાહકો સસ્તું ઇંધણ લેવા માટે રિટેલ પંપ તરફ વળ્યા હતા, જેના કારણે પુરવઠા પર દબાણ વધ્યું હતું.

Jio-bpએ હજુ ભાવ વધાર્યા નથી

Reliance Industries અને બ્રિટનની bpના સંયુક્ત સાહસ Jio-bp પાસે દેશમાં 2,304 પેટ્રોલ પંપ છે. તેણે અત્યાર સુધી પેટ્રોલ અને ડીઝલના ભાવમાં ફેરફાર કર્યો નથી.

તેલ કંપનીઓને નુકસાનનો અંદાજ

રેટિંગ એજન્સી Icraએ ગયા મહિને અંદાજ આપ્યો હતો કે સપ્ટેમ્બરમાં તેલ વેચતી કંપનીઓને પેટ્રોલ પર લગભગ ₹8 પ્રતિ લિટર અને ડીઝલ પર ₹9 પ્રતિ લિટરનું નકારાત્મક માર્કેટિંગ માર્જિન થઈ રહ્યું હતું. Icraના જણાવ્યા મુજબ, પેટ્રોલ, ડીઝલ અને LPG મળીને તેલ કંપનીઓને દરરોજ આશરે ₹530 કરોડનું નુકસાન થઈ રહ્યું હતું. ઊંચા કાચા તેલના ભાવ અને સ્થિર સ્થાનિક ઇંધણ ભાવને કારણે કંપનીઓની નફાકારકતા અને રોકડ પ્રવાહ પર દબાણ વધ્યું હતું. એજન્સીના જણાવ્યા મુજબ, જ્યારે કાચા તેલના ભાવ બેરલ દીઠ $85થી $90 વચ્ચે હોય ત્યારે તેલ કંપનીઓના રિફાઇનિંગ અને માર્કેટિંગ વ્યવસાયમાં ખર્ચ અને આવક લગભગ સંતુલિત રહે છે. તેનાથી વધુ ભાવ રહે અને રિટેલ ભાવમાં વધારો ન થાય તો નુકસાન વધવાની શક્યતા રહે છે.

ગુજરાતના વડિનારમાં રિફાઇનરી

Nayara Energy ગુજરાતના વડિનારમાં દર વર્ષે 2 કરોડ ટન ક્ષમતા ધરાવતી રિફાઇનરી ચલાવે છે. કંપની પાસે સમગ્ર દેશમાં 7,000થી વધુ ઇંધણ વેચાણ કેન્દ્રો છે. તાજેતરના ભાવ વધારાથી ખાનગી અને સરકારી પેટ્રોલ પંપ વચ્ચેના ભાવનો તફાવત વધુ વધી શકે છે. જો ઇંધણના ઊંચા ભાવ લાંબા સમય સુધી રહે તો પરિવહન અને સંચાલન ખર્ચ પર પણ તેની અસર પડી શકે છે.

આ પણ જુઓ

Watch onYouTube