આ દિવાળીએ ડ્રાયફ્રુટ નહીં, વિદેશી બેરી બની કોર્પોરેટ્સની પહેલી પસંદ!

દિવાળીના તહેવાર દરમિયાન કોર્પોરેટ ગિફ્ટમાં પરંપરાગત ડ્રાયફ્રુટ કોમ્બિનેશનની સાથે હવે ડીહાઇડ્રેટ કરેલી વિદેશી બેરીને પણ સ્થાન મળવા લાગ્યું છે. પિસ્તા અને બદામના ઊંચા ભાવને કારણે કંપનીઓ પોતાના ગિફ્ટ બજેટને ધ્યાનમાં રાખીને કાજુ, કિસમીસ સાથે વિવિધ બેરીનું કોમ્બિનેશન કરી રહી છે. મુંબઈના બજારોમાં આ વર્ષે બેરીની માંગ વધવાની ધારણા છે.

કાજુ-કિસમીસ સાથે બેરીનું કોમ્બિનેશન વધ્યું

મુંબઈ મેવા મસાલા મર્ચન્ટ્સ એસોસિયેશનના અધ્યક્ષ યોગેશ ગણાત્રાના જણાવ્યા અનુસાર, મસ્જિદ બંદરમાં આ વર્ષે ક્રેનબેરી, બ્લ્યુબેરી, સ્ટ્રોબેરી અને બ્લેક બેરી જેવી ડીહાઇડ્રેટેડ અમેરિકન બેરીના ઓર્ડર વધી રહ્યા છે. ₹1,000થી ₹2,000ની રેન્જમાં કોર્પોરેટ ગિફ્ટ આપવા માગતી કંપનીઓ મોંઘા પિસ્તા અને બદામના સ્થાને કાજુ, કિસમીસ અને બજેટ પ્રમાણે બેરીનો ઉપયોગ કરી રહી છે. મસ્જિદ બંદરમાં દિવાળી દરમિયાન વિવિધ પ્રકારની બેરીનું આશરે 50 ટન વેચાણ થવાનો અંદાજ છે.

ઊંચા ભાવને કારણે કોર્પોરેટ ઓર્ડર બેરી તરફ વળ્યા

વાશી APMCના ડ્રાયફ્રુટ હોલસેલ વેપારી દિનેશ ડંગે જણાવ્યું હતું કે બે-ત્રણ વર્ષથી ડ્રાયફ્રુટ સાથે બેરીનો ઉપયોગ કરવાનો પ્રયોગ શરૂ થયો હતો, પરંતુ આ વર્ષે પિસ્તા અને બદામના ભાવ ઊંચા હોવાથી તેની માંગમાં વધારો થયો છે. તેમના જણાવ્યા મુજબ, આશરે 20% કોર્પોરેટ ઓર્ડર બેરી તરફ વળી રહ્યા છે. વિદેશથી આયાત થતા સુકામેવા સામાન્ય રીતે 30 દિવસમાં ભારત પહોંચે છે, જ્યારે હાલની યુદ્ધની સ્થિતિમાં તેને પહોંચવામાં 65 દિવસ લાગી રહ્યા છે. વાશીમાં દિવાળી ગિફ્ટ તરીકે વિવિધ બેરીનું આશરે 20% વેચાણ થવાની ધારણા છે, જે લગભગ 20 ટન જેટલું હોઈ શકે છે.

કઈ બેરી કેટલા ભાવે મળે છે?

વાશી બજારમાં હાલમાં વિવિધ બેરીના ભાવમાં મોટો તફાવત જોવા મળે છે. ક્રેનબેરીનો ભાવ કિલોદીઠ ₹500, બ્લેક કરંટનો ₹750, સ્ટ્રોબેરીનો ₹1,200, બ્લ્યુબેરીનો ₹1,400, બ્લેક બેરીનો ₹1,800 અને ગોઝી બેરીનો ₹2,000 છે. ₹1,000 સુધીના ગિફ્ટ બજેટ ધરાવતી કંપનીઓ ક્રેનબેરી અને બ્લેક કરંટનો ઉપયોગ કરે છે. જ્યારે વધુ બજેટ ધરાવતી કંપનીઓ બ્લેક બેરી, ગોઝી બેરી અને બ્લ્યુબેરીનો ઉપયોગ કરી રહી છે.

બેરીથી ગિફ્ટ પેક પણ વધુ કલરફૂલ

ડ્રાયફ્રુટ સાથે બેરીના કોમ્બિનેશનનો એક ફાયદો એ પણ છે કે વિવિધ રંગની બેરીના કારણે દિવાળી ગિફ્ટ પેક વધુ રંગીન અને આકર્ષક દેખાય છે. વાશી APMCના વેપારીના જણાવ્યા મુજબ, કોલ્ડ સ્ટોરેજમાં રાખવામાં આવે તો આ બેરી દોઢ વર્ષ સુધી અને ઘરના રેફ્રિજરેટરમાં રાખવામાં આવે તો છ મહિના સુધી ખરાબ થતી નથી.

આ પણ વાંચો : Global Cues । 30 October 2026: GIFT Niftyથી Wall Street સુધી ક્યાં જોવા મળી રહી છે તેજી અને મંદી

આ પણ જુઓ:

Watch onYouTube